ޕިގުމީން
ޕިގުމީ، މި ބަހަހަކީ ދުނިޔޭގެ ޓްރޮޕިކަލް ޖަންގަލިތަކުގައި ދިރި އުޅޭ އެތިނިކް ގުރޫޕް ތަކަށް ކިޔައި އުޅޭ ނަމެކެވެ.އެންތުރޮޕޮލޮޖިސްޓުން މިބަސް ބެނުން ކުރަނީ އިސްކޮޅުން ކުރުކޮށް ތިބޭ އިންސާނުންގެ ޖަމާޢަތްތަކަށެވެ.ޢާއްމުގޮތެއްގައި ޕިގުމީ ފިރިހެނުންގެ އެވުރެޖު އިސްކޮޅަކީ 4ފޫޓު 11 އިންޗިއެވެ.
އެއަށްވުރެ އިސްކޮޅުން ދިގު ޖަމާޢަތްތަކަށް ކިޔައި އުޅެނީ ޕިގުމޮއިޑް އެވެ.އެންމެ ބޮޑަށް މޝްހޫރުވެފައިވާ ޕިގުމީންނަކީ މެދުތެރޭ އެފުރިކާގައި ދިރި އުޅޭ "އަކާ"،އިންނާއި "އެފޭ"އިންނާއި މުބޫޓީ އިންނެވެ.
ޕިގުމީން ދިރި އުޅެނީ ހަމަ އެކަނި އެފްރިކާގައެއް ނޫނެވެ.އެބައި މީހުންގެ ޤަބީލާތައް ތައިލެންޑު،މެލޭޝިޔާ،ޕިލިޕީންސް،އިންޑޮނީޝިޔާ،އަދި ޕަޕުއާނިއުގިނީގައި ވެސް ދިރި އުޅެމުންގެންދެއެވެ.
"ޕިގުމީ" މިބަސް ދެކުނު އިރުމަތީ އޭޝިޔާގެ ޖަންގަލިތަކުގައި އެކަހެރިކޮށް ދިރި އުޅޭ ނެގްރިޓޯ އިންގެ ގަބީލާތަކަށްވެސް ބެނުންކުރެވެއެވެ.އެބައިމީހުންގެ ތެރޭގައި ހިމެނެނީ އައީޓާ،އަގަޓާ، އައިޓާ،އަދި،އީޓާ،ބަލޫގާ،އަޓީ އަދި ޕިލިޕީންސްގެ ޖަންގަލިތަކުގައި ދިރިއުޅޭ "މަނީ" ދަރިކޮޅުގެ މީހުންނެވެ.މީގެ އިތުރަށް އަންޒަމާން ކަރައާއި،ނައްކަބާރު ގައި ދިރި އުޅޭ ޤަބީލާތަކަކީވެސް ޕިގުމީންނެވެ.އެފްރިކާގެ ޕިގުމީންނާއި އޭޝިޔާގެ ޕިގުމީންގެ ކިބައިގައިވެސް އެއްގޮތް ސިފަތަކެއް ހުރެއެވެ.ކުރު އިސްކޮޅާއި ބުޅިއިސްތަށިގަޑެވެ.ހަމަ އެހެންމެ ގައިގެ ކަޅު ކުލައެވެ.އަދިވެސް ނޭގި އޮތްކަމަކީ އެބައިމީހުންގެ އަސްލާއި،އޭޝިޔާއަށް އެބައިމީހުން ހިޖުރަ ކުރިމަގެކެވެ.ޖެނެޓިކަލް ގޮތުން ބަލާއިރު އެފްރިކާގެ ޕިގުމީންނާއި އޭޝިޔާގެ ނެގްރިޓޯ އިންނާއި މާބޮޑު ގާތް ކަމެއް ނެތެވެ.މިހާތަނަށް ކުރެވުނު ދިރާސާތަކު ގައި މީގެ 1000އާއި3000އާ ދެމެދުގެ މާޒީއެއްގައި މައިކުރޮނީޝިޔާގެ ޕަލައުގެ ޖަޒީރާތަކުގައި އުޅެފައިވާ 25އަށް ވުރެ ގިނަ ޕިގުމީންކަމުގައި ބެލެވޭ އިންސާނުންގެ ކަށި ފެނިފައިއެވެ.
ކޮންމެއަކަސް "ޕިގުމީ"މިނަމަކީ އެބައިމީހުން ނިސްބަތްވާ ޤަބީލާތަކުގެ މީހުންގެ މެދުގައި ވަރަށް ހުތުރު ނަމެކެވެ.އެފަދަ ޤަބީލާތަކުގެ މީހުން ބޭނުންވަނީ އެބައިމީހުންނާއި މުޢާމަލާތް ކުރާއިރު އެބައިމީހުންގެ ޤަބީލާތަކަށް ނިސްބަތްކުރުމަށެވެ.އެގޮތުން ސެންޓްރަލް އެފްރިކަން ރިޕަބްލިކުގައި ދިރިއުޅޭ ޕިގުމީންނަކީ "އަކާ"(މްބެންގާ)ބަކާ،މުބޫޓީ،އަދި ތުވާ އިންނެވެ.
ޕިގްމީ މިބަސް އުފެދިފައިވާގޮތް:
ޕިގުމީ މިބަހަކީ ޔޫނާނީ ބަހުން ލެޓިންބަހަށް ވަދެފއިވާ ބަހެކެވެ.މާނައަކީ އުޅަބޮއްޓާއި ކަކުލާއި ދޭތެރޭގައި ހުންނަ ދުރުމިނެވެ.ގްރީކު މިތޮލޮޖީގައި މިބަހަކީ ޑުވޯފުންގެ ޤަބީލާއކަށްދެވިފައިވާ ނަމެކެވެ.
ވަރަށް ގިނަ ތަންތަނުގައި ޕިގުމީންނަކީ އެތަނެއްގައި ފުރަތަމަ ވަޒަންވެރިވީ މީހުންކަމުގައި ކިޔައެވެ.ތަފާތު ތަންތަނުގެ ޕިގުމީން ވާހަކަދައްކައި ހަދަނީ ތަފާތު ބަހުރުވައިންނެވެ.ގިނަފަހަރަށް ޕިގުމީން ދިރި އުޅޭ ސަރަޙައްދަކާއި ކައިރި ހިސާބުތަކުގައި ދިރިއުޅޭ ޕިގުމީން ނޫން މީސްމީހުންގެ ބަހާއި އެވެރިންގެ ބަހާއި ގާތްކުރާގޮތެއް ހުރެއެވެ.
ޕިގުމީންގެ ބަހުރުވަތަކުގައި ބޭނުންކުރެވޭ ބައެއްބަސްބަސް، ތަފާތުތަންތަނުގައި ދިރިއުޅޭ، ތަފާތު ބަހުރުވަތަކުން ވާހަކަ ދައްކާ ޕިގުމީންގެތެރޭގައިވެސް ބޭނުންކުރެވޭތަން ފެނެއެވެ.އޭގެތެރެއިން އެއްބަހަކީ "ޖެންގީ"އެވެ.އެއީ އެބައިމީހުންގެ ބަހުރުވައިން ޖަންގައްޔަށް ކިޔާނަމެވެ.
ޕިގުމީންދިރިއުޅެނީ ކިހިނެއްބާ؟
އެބައިމީހުން ދިރި އުޅެނީ ޖަންގަލީގެތެރޭގައި ޝިކާރަކޮށްގެންނެވެ. އެބައިމީހުން ހިފާޖަނަވާރުތަކުގެ ތެރޭގައި އުދުހޭ ފުއްލާއާއި،ރާމާމަކުނާއި،މީދަލާއި އޫރުފަދަ ޖަނަވާރު ހިމެނެއެވެ.މޭވާތަކުގެ ތެރޭގައި އެކިޒާތްޒާތުގެ ބެރީއާއި ފޮނިރަހަދޭ މޭވާ ހިމެނެއެވެ.ކައްޓަލައާއި ދަނޑިއަލުއްވާއި،ބައެއްކަހަލަ ފަތްޕިލާވެލިވެސް ކެއުމުގެތެރޭގައި ބޭނުން ކުރެވެއެވެ.މީގެ އިތުރަށް ޕިގުމީން މާމުއި ހަތާ ނަގައިގެންވެސް ބޭނުންކުރެއެވެ.ޕިގުމީންގެ ގާތުގައި ޖަންގައްޔަކީ އެބައި މީހުންނަށް ހުރިހާ އޯގާތެރިކަމެއް ފޯރުކޮށްދޭ ފަރާތެވެ.
ޕިގުމީން ދިރިއުޅޭ ސަރަޙައްދު ތަކާއި ކައިރި ހިސާބުތަކުގައި ދިރިއުޅޭ ދަނޑުވެރިންނާއި ޕިގުމީންނާއި ދޭތެރޭ ގާތްގުޅުމެއް އޮވެއެވެ.ބައެއްފަހަރު ދަނޑުވެރީންނަށް ކުދިކުދި މަސައްކަތްތައްވެސް ކޮށްދީހަދައެވެ.ޖަންގަލީގެ އުފެއްދުންތަށް ދީފައި ދަނޑުވެރީންގެ އަތުން އެބައިމީހުން ބޭނުންވާ ތަކެތި ހޯދައެވެ.
ޕިގުމީންނަށް ދިމާވެފައިވަނީ ކޮންކަހަލަ މައްސަލަތަކެއް؟
ދުނިޔޭގެ އެކިގައުމުތަކުން ތަރައްޤީވުމަށް ކުރާ މަސައްކަތްތަކުގެ ސަބަބުން ދުނިޔޭގައިވާ ބޮޑެތި ޖަންގަލިތަށް ދަނީ ދުވަހެއް ދުވަހަކަށް ކުޑަވަމުންނެވެ.ކޮންމެ ދުވަހަކު ޖަންގަލިތަކުން އެތަށް ސަތޭކަ ގަހެއް ކަނޑައި ތިރިކޮށްލެވެއެވެ.އެއީ ގެދޮރު ބިނާކުރުމަށާއި،ފަރުނީޗަރު ތައްޔާރުކުރުމަށާއި،ކަރުދާސް އުފެއްދުމަށެވެ.އަދި އެކިއެކި ގައުމުތަކަށް އެކްސްޕޯޓްކުރުމަށެވެ.ނުވަތަ ގޮވާންކުރާނެ ދަނޑުފަގު އިތުރުކުރުމަށެވެ.ނަތީޖާއަކަށްވަނީ ޕިގުމީން ދިރި އުޅޭ ޖަންގަލިތައް ހަނިވަމުން ދިޔުމެވެ.އަދި އެފަދަ ތަންތަނުގައި އަލަށް އާބާދުވާ "ޒަމާނީ" އިންސާނުންގެ ސަބަބުން ޖަންގަލިތަކުގެ އަހުލުވެރީން އެތަންތަނުން ފަހާލެވެއެވެ.
ބައެއް ޤައުމުތަކުގައި ޕިގުމީން ޖަންގަލިތަކުން ފަހައިލުމަށްފަހު އެތަންތަނަކީ ،ނޭޝަނަލް ޕާރކުތަކެއްކަމުގައި ހަމަ ޖައްސައެވެ.އެކަމުގެ ސަބަބުން ޖަންގަލިތަކުގެ އަހުލުވެރީން އެބައިމީހުންގެ ހުރިހާ ޙައްގުތަކުން މަޙުރޫމްވެއެވެ.
ބައެއް ޤައުމުތަކުގައި ޕިގުމީންނަށް ރައްޔިތުންނަށް ލިބިދޭންޖެހޭ އެއްވެސް ހައްގެއް ލިބިނުދެއެވެ.އެބައިމީހުން ގަބޫލުކުރާގޮތުގައި ޕިގުމީންނަކީ "ވަލު"މީހުންނެވެ.އެއީ އެއްވެސް ޙައްގެއް ލިބެންޖެހޭ ބައެއްނޫނެވެ.
އެފްރިކާގެ ކެމެރޫންގެ ޖަންގަލީގައި ދިރިއުޅެމުންދާ ބަގޭލީ ޕިގްމީންގެ ދިރިއުޅުން މިހާރު ވަނީ މުޅީން ހަލާކުވެފައެވެ.ވޯލްޑް ބޭންކުން ސޮޕޮންސަރ ކޮށްގެން އަޅަމުން ގެންދާ ތެޔޮހޮޅިތަކެއް އެދަނީ ސީދާ ޕިގުމީންގެ ބިމުގެ މެދުންނެވެ.
ޑިމޮކުރެޓިކް ރިޕަބްލިކް އޮފް ކޮންގޯގެ އިރުމަތީގައި ދިރި އުޅޭ ޕިގުމީންނާއި،ބުރުންޑީ އާއި ޔޫގެންޑާގެ ޖަންގަލިތަކުގައި ދިރިއުޅޭ ޕިގުމީންނަށް މިހަރުވަނީ ހަދާނެ ގޮތްހުސްވެފައެވެ.މިހާރު އެބައިމީހުންގެ ޖަންގަލިތައް އެވަނީ މުޅީން ހަލާކުކޮށްލާފައެވެ.އަދި މިހާރު ޕިގުމީންނަށް މަޖުބޫރުވެފައިވަނީ "މިޒަމާނުގެ"އިންސާނުން ދިރި އުޅޭ ހިސާބުތަކަށް ނިކުމެ ހައިހޫނުކަން ފިލުވުމަށްޓަކައި އެކިއެކި މަސައްކަތްކުރާށެވެ.އެހެން ނޫނިއްޔާ ސަލާން ޖަހާށެވެ.މިގޮތަށް ނިކުމެ އުޅުމުގެ ސަބަބުން އެބައިމީހުންގެތެރޭގައި ދުންފަތާއި ރާވަނީ ތަޢާރަފުވެފައެވެ.އަދި ހަކުރުލާފައި ހުންނަ އެއްޗެތި ކެއުމުގެ ސަބަބުން އެބައިމީހުންގެ ދަތްތަކަށް ނުހަނު ބޮޑެތި ގެއްލުންވަމުން އެބަ ދެއެވެ.ކުރީން އެބައި މީހުންނަށް ނުޖެހޭ ތަފާތު އެތައް ބަލިތަކެއް ވަނީ ޖެހެންފަށައިފައެވެ.
ރިޕަބްލިކު އޮފް ކޮންގޯގައި ޕިގްމީންގެ ނަސްލު ފޮހެލުމަށް މަސައްކަތް ކޮށްފައިވެއެވެ.
2003 ވަނަ އހަރު ކޮންގޯގެ މްބޯޓީ ޕިގުމީންގެ ފަރާތުން،ޔުނައިޓެޑް ނޭޝަންސްގެ އިންޑިޖިނަސް ޕީޕަލްސް ފޯރަމްގައި ވާހަކަ ދައްކަވަމުން ސިނަފާސީ މަކީލޫ ވިދާޅުވީ ކޮންގޯގައި ހިނގި ދާޚިލީ ހަގުރާމައިގެ ތެރޭގައި ވަލުތެރޭގައި ދިރިއުޅުނު އޭނާގެ ޤަބީލާގެ އެތައްބަޔަކު ފަހައި އަތުލައިގަތުމަށްފަހު ގެނެސް ގެރިބަކަރިއާއި ފުއްލާފަދަ ޖަނަވާރުހެން ފިހެގެން ކާފައިވާކަމަށެވެ. އަދި އަވަށްޓެރި އުތުރުކީވޫޕްރޮވިންސްގައިވެސްމިނިމަސްކައިފައިވެއެވެ.އެތަނުގައި މިނިމަސްކައިފައިވަނީ ދަ އިރޭޒަރސް އޭނަމަކަށް ކިޔުނު ބައިގަޑަކުންނެވެ.އެބައިމީހުން ޕިގުމީން ނައްތާލަން ބެނުންވީ އެކިއެކި މަޢުދަނު ނެގުމަށްޓަކައި ޕިގުމީންގެ ބިމުގެ ބޭނުމުގައެވެ.
ކޮންގޯގެ ދާޚިލީ ހަގުރާމައިގައި ތަޅައިފޮޅި ދެފަރާތުންވެސް ޕިގުމީންނާއި ދޭތެރޭގައި ކަންތަށް ކޮށްފައިވަނީ ވަރަށް އިހާނެތިކޮށެވެ.އެބައިމީހުން ޤަބޫލުކުރާ ގޮތުގައި ޕިގުމީންނަކީ އިންސާނުންނަށްވުރެ މާދަށު ދަރަޖައިގެ މަޚްލޫގުންތަކެކެވެ.އަދި އޭގެތެރެއިން ބަޔަކު ގަބޫލުކުރާގޮތުގައި ޕިގުމީންގެ މަސްކެއުމުން އެބައިމިހުންނަށް ޖާދުވީ ބާރުތަކެއް ލިބެއެވެ.
ޔުނައިޓެޑް ނޭޝަންސްގެ ސެކިޔުރިޓީ ކައުންސިލްގައި މަކީލޫ އެދިވަޑައިގަތީ މިނިމަސް ކެއުމަކީ މުޅި އިންސާނިއްޔަތާއި ދެކޮޅުވެރި ޢަމަލެއްކަމުގައި ބަލައިގަތުމަށެވެ.އަދި އެއީ ޕިގުމީންގެ ނަސްލު ވުޖޫދުން ފޮހެލުމަށްޓަކައި ހިންގި ލާއިންސާނީ އަމަލެއްކަމުގައި ޤަބޫލުކުރެއްވުމަށެވެ.
ليست هناك تعليقات:
إرسال تعليق